عبادة ولا موضه

السلام عليكم ورحمة الله وبركاته

كل سنة والجميع بخير إن شاء الله

الحمد لله الذى أحيانا ومن علينا بأن بلغنا رمضان ونسأل الله أن يجعلنا من عتقائه من النار

كل سنة فى نفس الموعد ومع بداية شهر رمضان المساجد تمتلئ بالناس لدرجة انك قد لا تجد لك مكانا وتجد بعض الناس (السذج ) سعداء وإن الناس بتحب الدين والملتزمين كتير وهناك صحوة وكلام كثير لا يدل إلا على جهل بالاسلام وعدم فهم للالتزام وما أراده الله من المسلم

أنا لا أشكك فى النوايا فهذه حسابها عند الله و نحن لنا الظاهر من الناس ولكن عندى شوية تعليقات على كام موقف لفت نظرى لتكراره خصوصا فى رمضان

1- الصلاة فى مساجد معينة (لا تشد الرحال إلا إلى ثلاثة مساجد
المسجد الحرام
المسجد النبوى
المسجد الأقصى

اللى مش عاجبنى فى المشهد د إن اللى بيصللى فى مسجد معين بيتكلم معاك ويحسسك كأن يوم القيامة هينادى ملك اللى كان بيصللى التراويح فى المسجد الفلانى يدخل الجنة واللى ماكنش بيصللى هناك يدخل النار الموضوع دخل فيه جزء من الرياء أو عدم الفهم للغرض من صلاة التراويح
حاجة تانية والمشهد ده استفزنى جدا : المصللين راكنين عربياتهم جنب المسجد صف تانى وثالث والمرور متعطل والحجة انه بيصللى . المصللى ده ما وصلوش ان من الدروس والفوائد المطلوبة من الصلاة هى النظام وإلا ليه بنقف صفوف واحنا بنصللى وأكيد كلنا سمعنا الامام بيقول استقيموا

وساووا الصفوف وأن الله لا ينظر إلى الصف الأعوج اده يدل على إن الصلاة فيها احترام وفيها نظام

وأنا بتأفرج على المنظر ده تخيلت لو أن سيدنا عمر بن الخطاب كان حيا أعتقد والله أعلم لدخل عليهم المسجد ونزل عليهم ضربا بدرته _رضى الله عنه_

2- الجلباب

تلاقى كل الرجالة بيلبسوا جلبية خصوصا وهو رايح يصلى حتى الآن مش لاقى أى علاقة بين الجلبية والصلاة ولا أذكر أن من شروط صحة الصلاة ان المسلم يلبس جلبية

الجلبية عادة وليست عبادة

مش فرض ولا سنة ولا أى حاجة خالص انما هى عادة عربية فى اللبس زيها زى ما تأكل بايدك ولا بمعلقة حسب البلد اللى انت فيها وحسب ما اتعودت بشرط ستر العورة

وأعتقد والله أعلم لو بعث النبى صلى الله عليه وسلم إلى قوم يلبسون القميص والبنطلون كان ارتدى نفس زى قومه أيا كان طالما يستر العورة ويتفق والفطرة

3- الاسدال :

ده بقى موضوع تانى لأنه معدش التزام ده بقى موضه وتلاقيه متعان فى الدولاب وأول يوم رمضان يطلع وأول يوم العيد ولا كأنه موجود غير طبعا العباية الضيقة واللى كلها ألوان وملفته للنظر واللى مفتوحة من الجنب واللى ...... وغيره

البنت اللى بتلبس اللبس ده مش واخدة بالها ان من شروط صحة الحجاب انه ما يكونش ثياب شهرة وانه ما يكونش زينة فى حد ذاته .

مرة تانية أنا مش بشكك فى النوايا وكل واحد أدرى بنيته ونسأل الله أن يغفر لنا ويعفوا عنا ويرزقنا الاخلاص ويهدينا إلى ما فيه صلاح الأمة وخيرها ان شاء الله ويعيد علينا رمضان ويبلغنا فيه ما نطمح

ذكريات من غزة

مع أستاذى الدكتور ابراهيم عراقى

قد لا يمنحك الله شرف أن تشارك في المعركة لكنه قد يكرمك بالجلوس مع أحد الأبطال العائدين منها لتسمع منه عنها ما فاتك من أحداثها. المعركة معركة غزة 2008/2009 والبطل ليس محاربا بل طبيبا ألا وهو الدكتور ابراهيم عراقى أستاذ الكلى والمسالك البولية بكلية الطب جامعة المنصورة ، والذى ذهب إلى غزة مع وفد اتحاد الأطباء العرب في نفس الفوج الذى ضم الدكتور محمد غنيم.

بداية طلبت من أستاذى د. ابراهيم أن يكون الحوار انسانيا بعيدا عن السياسة وتقلباتها وكان الآتى
يحكى الدكتور ابراهيم بعض المواقف الإنسانية :
وإحنا داخلين على المعبر وطائرات الإف16 بتضرب المنطقة الحدودية بين مصر وقطاع غزة رحبوا بينا فى الأتوبيس كأن انت واحد رايح لهم فى فرح هو مبسوط وشه منفرج وبيشكر المصريين كلهم وبالنسبة لينا كانت مفاجاة بيوزع عصير على كل كل واحد من الناس اللى فى الأتوبيس كان بالنسبة لنا مفاجأة ان الناس دى منتبهة للحاجات البسيطة دى لأن اللى ينتبه للأشياء البسيطة دى لازم يكون فى حالة تركيز عالى جدا بحيث دماغه صافى .
المقابلة دى بالذات ادتنا احساس ان احنا رايحين على ناس ثابتين قوى ومطمئنين قوى.
هذه اللفتة البسيطة أول ما تدخل تلاقى الناس بتوزع عليك عصير لأنك بقيت فى ضيافتهم نفس المنظر لما رحنا المستشفى بدل العصير شاى سخن ووزير الصحة بيرحب بيك ويرحبوا بمصر . الناس كانت بتتكلم عن مصر بكل تبجيل واجلال . كانت هناك سجالات سياسية فى هذا الوقت لم يكونوا يتحدثوا فى هذه الأمور على أى مستوى مدركين ان دى حاجات جانبية أهم شئ إن المصريين معانا ودكاترتهم جايين يساعدوا دكاترتنا وهى دى مصر وجزاهم الله خير. - فى وسط الضرب وطائرات الاستطلاع عمالة تزن على باب المستشفى واحد بيبيع فول ولب واللوحة وراه ألا بذكر الله تطمئن القلوب .
واحد تانى ماشى ببراد شاى سخن دى توريك ازاى الإنسان فى سلوكه يتكيف مع الواقع وما ينكسرش هو يعرف يعمل كده فبيعمل وفى ناس محتاجاها فبيعملها ماقالش لنفسه فى حرب أبطل شاى
- المشرحة : منظر الناس وهى بتاخد أبناءها وماشية بيهم سكينة أسطورية محدش بيصوت ويقين فى الشهادة
- موقف المخبز : كان فى مخبز جنب المستشفى كانت الناس تقف طابور قدامه مستنية العيش طابور منتظم محدش بيزق حد ولا حد بيشتم حد كله مستنى دوره بنظام و أدب ولما الطابور طول شوية عملوا زجزاج علشان الطابور ما يطلعش برة الرصيف ده يدل ان الشعب ده متحضر وعنده ثقة فى ان حقه مش ضايع وان هو هيأخد العيش المخصص له ومحدش هيأكل حقه.
- استهداف المبانى الغير عسكرية: أهداف العدو كانت واضحة ضرب الجامعة الاسلامية وضرب جامعة البنات ضرب مقرات الوزارات ضرب مستشفى الاقصى ضرب سيارات الاسعاف كل ده متعمد وليس خطأ هو عنده استطلاع لا يغادر سماء غزة ويعرف ماذا يضرب بدقة هو يحطم مقدرات الشعب بشكل اجرامى
- كنا ساكنين فى عنبر جزء من مستشفى الولادة سبحان الله المكان كان شغال 24 ساعة من غير كلل ولا ملل ومن نعمة ربنا عليهم ان عدد المواليد من بداية الحرب حتى يوم العودة 3550 مولود
- الجرحى كتير ومعظمهم بتر أطراف ومحتاجين نوع من العلاج الطبيعى ونوع من العلاج النفسى والاجتماعى لكن الفلسطينيين قالوا لنا معلومة غريبة جدا ان أى مقاوم أو أى حد حصله أثر من اثار المعارك البنات الفلسطينيات يتهافتون عليه للزواج مش هو اللى يروح يخطب لأ ده يتخطب
- كان فى طبيبة فى المستشفى استشهد أخوها واتنين من ولاد عمها وجم المستشفى وهى نبطشية وسبحان الله لم تهتز زيهم زى كل الشهداء اللى هى شايفاهم يعنى احساس الناس ان الشهداء كلهم واحد حتى أخوها وولاد عمها .
حضرتك يا دكتور بتقول ان اليهود عندهم استطلاع لا يغادر سماء غزة وعندهم معلومات دقيقة عن الأهداف التى تقصف لكن الجيش وضعه مختلف فالجندى الذى يركب الطائرة ليقصف مدرسة أو مستشفى أو اى مبنى هو لا يفكر ماذا يقصف هو يتلقى أمر وينفذه :
انا لا أتكلم عن الجيش الاسرائيلى كأفراد انما بتكلم عن روح المؤسسة العسكرية وهى أن تنكل بهذا الشعب تقصف دور العبادة ليس فقط المساجد أيضا الكنيسة قصفت وهناك نصارى قتلوا فى بنت نصرانية حوالى 14 سنة أحضروها الى المستشفى فى حالة سيئة وماتت أمامنا هم ينظرون لنا نظرة احتقار ليس فيها أى احترام لانسانيتنا بالنسبة لهم الفلسطينى الجيد هو الفلسطينى الميت.
منظر لا أنساه أم و5 أطفال محترقين تماما بالفسفور الأبيض وضعوا على النقالة وعلى ما وصلو المستشفى النقالة الحديد ساحت أنا ما عرفتش أميز غير 4 اطفال بس اللى جابوهم قالوا انهم كانوا 5.
نرجع ورا بالذاكرة شوية دكتور ابراهيم الفكرة جت لحضرتك امتى وازاى ؟
كنا فى نقابة أطباء القاهرة يوم الجمعة كان فى مؤتمر لمساندة غزة وإحنا هناك جالنا الخبر ان أول وفد من الأطباء المصريين عبر معبر رفح هو كان بقالهم حوالى 4 أيام منتظرين انهم يعدوا دخلوا يوم الجمعة واحد من اللى كانوا منتظرين أستاذ مسالك اعتذروطلب منى أروح مكانه وبالفعل اتحركنا يوم الأحد العصر معاملة أهل العريش لينا كانت ممتازة لما مدخلناش أول يوم الناس كلها كانت عايزة تستضيفنا لكن اتحاد الأطباء العرب كان مجهز لنا مكان نبات فيه لحد ما دخلنا .
واحنا قبل ما نخش على المعبر بشوية دار حوار بينى وبين نفسى احنا هناك مالناش دور قوى والحرب شغالة ما يللا نرجع بعد كده تذكرت انى أنا اللى قاعد اقول الناس جهاد وتبرع فتذكرت قول الله تعالى " يا أيها الذين أمنوا لم تقولون ما لا تفعلون " فخدت قرار انى أكمل
الموقف فى البيت؟
كان كويس محدش فت فى العضد لا المدام ولا الأولاد وإحنا في المعبر الضرب اشتد ولسة ما ختمناش الجواز وإحنا بنكتب الإقرار ان إحنا متحملين المخاطرة كلها دكتور جنبى مال عليا وقاللى الخطر ده محسوب كويس ؟ قلت له خلاص فات وقت الحساب.
من الحاجات اللى بسطتنى مجموعة الدكاترة اللى سبقتنا دكتور تخدير مصرى كان ما شاء الله بيمر على 8 اوض وجراح عظام سنه يقترب من 60 سنة اشتغل فى اليوم 8 و9 و10 عمليات كم رهيب لحد فى السن ده .
الدكاترة الفلسطينيين الكبار اللى كانوا على المعاش بعضهم جاى يشتغل .
بالليل ما كنش فى شغل فكنا وإحنا رايحيين ننام والقصف شغال فكان واحد زميلنا يقول احنا هننام على الموسيقى التصويرية للزنانة (طائرات الاستطلاع) .
وانت نايم القصف ساعات يبقى قريب تسمع القصف وتغمض عينك وتكمل نوم فى إحدى المرات القصف كان قريب جدا كان مبنى جنب سور المستشفى اضرب فقزاز العنبر اللى كان بايت فيه مجموعة من زمايلنا اتكسر فدخل هوا ، البرد مع صوت الضرب كلهم قاموا اتوضوا وقعدوا يصلوا ويدعوا لحد الفجر
بيتهيألى اتعودتم على صوت الضرب؟
من بدرى واحنا فى رفح المصرية على المعبر وخلفية الضرب موجودة وتأقلمنا عليها
الاستقبال؟
كنت كلمتك عن استقبال الفلسطينيين فى المستشفى محضرين لك مكان كويس ويمكن أكتر فترة فى الربع قرن الأخير اللى أكلت فيها 3 وجبات الصبح والظهر وبالليل بانتظام هى الفترة اللى قضيتها هناك لأ وايه عيش طري وجبنة وحلاوة وعسل أبيض فى الفطار والعشا الظهر أكل سخن أرز ولحمة وخضار الأكل يجى ملفوف فى ورق سلوفان وشكله جميل كل دكتور وزعوا عليه بالطو أبيض وID واعطوه شريحة موبايل علشان يكلم أهله.
انتباه الناس دى وادراكهم للأمور البسيطة دى يحسسك ان الشعب يدار بشكل جيد والدكتور غنيم أشار ليها وهو راجل ادارى قال : أداء ادارى عالى ومستوى يوحى بالثقة والاطمئنان كل الناس بتمارس عملها بهدوء وبذاتية جامده جدا جريح داخل وجريح خارج والناس العمال بينظفوا كويس جدا . التعقيم شغال علطول النور مثلا ما اتقطعش فى المستشفى
سؤال محيرنى الحاجات دى منين مش المفروض في حصار ؟
عبقرية الشعب الفلسطينى فى التعامل مع الموقف يعنى هو عنده احتياجاته الذاتية وعنده خزينه ومستعد للمعركة ، فى نفس الوقت من خلال التهريب ما هواش محروم من حاجة كل حاجة موجودة بس ثمنها غالى وقصة التهريب ده صراع من أجل البقاء علشان كده الحل الوحيد لوقف التهريب هو فتح لمعابر .
كلها أقصد ال7 معابر؟
كلها وخاصة معبر رفح هم ما بيحبوش يشتروا من اسرائيل مصر أقرب ليهم ومصر أقرب ليهم دى مش وهم .
إحنا لما عدينا كنا بنتكلم مع أهل غزة زى ما بتكلم مع أهل العريش مفيش اختلاف كبير مثلا من المنصورة لدمنهور زى من المنصورة لغزة يعنى موضوع ان غزة بلد تانية ده بس على الورق انما الواقع ما حسناش يعنى أنا لما سافرت السعودية حسيت انى سافرت السعودية لما سافرت الكويت حسيت اه انى بقابل شعب عربى بس شعب تانى لما رحت غزة ما حستش الاحساس ده أنا بقابل ناس زى اللى أنا عارفهم فى مصر مفيش اختلاف لا شكلى ولا فى الكلام ولا فى المعاملة ولا فى أى حاجة خالص . الأقرب حاليا فى ذهنى ان غزة دى محافظة من محافظات مصر مش دولة تانية.
شكل مدينة غزة ؟
حالة الرصف تتفوق على كثير من المدن المصرية والدكتور غنيم علق وقال شوارع غزة أنظف من شوارع المنصورة والبرد هناك ماهوش قارص زى هنا الجو الصبح شمس ودافئ وشاطئ غزة ذكرنى بشواطئ اسكندرية منظر رائع جدا
مستشفى غزة عاملاها منظمة الأمم المتحدة للتنميةUNDB والتوسعات اللى فيها قام بيها الجمعيات الخيرية غير الحكومية قبل السلطة .
لقيت فى قسم المسالك مبعوت لهم من قطر مناظير وأجهزة حديثة لم تمكنهم الظروف حتى انهم يفكوها ويتعرفوا عليها فكيناها وعرفناهم ازاى يستخدموها.
مستوى المسعفين عالى جدا بعض المرضى يوصلوا فى الاسعاف متركب لهم أنبوبة حنجرية ومعمول لهم تنفس ومتركب كانيولا ولاين والمحاليل شغالة يعنى المسعف عالى المستوى ومدرب تدريب جيد وده تدريب فلسطينى هو خريج كلية التمريض فى الجامعة الإسلامية فى غزة .
هو مفيش عندهم كلية طب ؟
فى بس لسة ما طلعتش خريجين
طب والدكاترة الفلسطينيين اتعلموا فين ؟
تعليم خارجى معظمهم مصر أو دول أوروبا الشرقية
بالنسبة لشكل المستشفى ؟
المستشفى مقارنة بما كان فى تصورنا يعتبر جيد جدا . النظافة العامة غاية فى الامتياز الأسانسيرات كلها شغالة السلالم نظيفة وواسعة الفرش كان غاية فى النظافة مستوى محترم ، قسم الأشعة معقول ومعامل التحليل كويسة . الأطباء بالنسبة للأعمال الروتينية كويسين جدا لكن بالنسبة للتقنية الحديثة معظمهم محتاج إعادة تدريب وهم هناك متعطشين للعلم بس محتاجين فرصة يأخدوا دورات تدريبة على الحاجات الجديدة علشان يقدروا يفيدوا شعبهم واحنا هناك عملنا اتفاق مبدئى على تدريب بعضهم عندنا ولكن تنقص بعض الترتيبات.
المستشفيات مقارنة بالمستشفيات المصرية ؟
أعتقد هى مستواها جيد جدا مقدرش أقول ان فى أى مدينة مصرية بحجم مدينة غزة لازم فيها مستشفى بهذا المستوى المستوى اللى شفناه أحسن مما توقعت التجهيز بشكل معقول الادارة متماسكة الأقسام المعاونة جيدة يعنى الاهتمام بأدق التفاصيل . كان فى المستشفى كافتريا للى عايز أى حاجة كان فيها وجبات زى أى مطعم عصائر ومشروبات وسندوتشات .فى معظم المناحى ممكن تكون أحسن من كتير من المستشفيات المصرية ، كمستشفى حكومى ومستشفى عام .
هيئة التمريض ؟
مستوى عالى جدا ، معظم ممرضى العمليات ذكور على عكس مصر أداءهم عالى المستوى يعنى نظامهم واستجابتهم وحرفيتهم عالية جدا رغم ان معظمهم كان بيشتغل أوقات طويلة قوى لكن من رحمة ربنا ان الشغل كان بييجى على دفعات فيدى للناس فرصة تستريح وتواصل .
إنما رغم كثرة الجرحى والدماء النازفة تلاقى الأرض نضيفة مفيش نوع من التراخى عمال النظافة والاداريين كانوا على مستوى عالى مفيش مثلا دكتور وهو بيعمل عملية احتاج حاجة وملقهاش ده برضه صعب فى وسط الحصار .
ده شئ ذاتى ولا حسن الادارة ؟
ذاتى هو مستعد ومدرك ان احتمال الحرب قائم وفى نفس الوقت الادارة منسقة كويس مع مصر، الهلال الأحمر المصرى كان له دور رائع فى نقل الجرحى فى نفس الوقت معبر رفح كان مفتوح لدخول كل الأدوية والمستلزمات الطبية بمنتهى السلاسة يوميا فده كان كافى لتعويض أى نقص فى المستلزمات الطبية
المنظمات اللى كانت هناك؟
منظمة اسمها هيلب دوكتورز أطباء من النرويج والدنمارك واردنيين وبحرينيين
أطباء بلا حدود : فرنسيين ومغربيين وجزائريين كل الجنسيات كانت ممثة لكن المصريين يشكلوا أغلبية الوفود جزء من الدكاترة كان مهتم بتوثيق وضع الجرحى زى مادس جلبرت طبيب نوييجى وسمير كسكس دانمركى من أصل سورى ومن المؤسسات اللى الواحد شافها برضه معظم المحطات العالمية كانت موجوده.
وأعتقد ان من أهم الأشياء اللى حصلت فى الحرب دى هى حرب الصورة أعتقد ان الاعلام الفلسطينى والاعلام العربى لأول مرة يكسبوا جولة ضد اسرائيل فى 48 محدش حس فى 56 أعدمت اسرائيل 5500 فلسطينى فى 6 ساعات فى 67 يقال 27 ألف تم اعدامهم.
ده يرجع لضعف وسائل الإعلام وقتها ؟
نسبيا كان العدو عنده سيطرة على وسائل الاعلام الورقية برضه فى أوائل الاعلام المرئى لكن من الواضح إن الإعلام العربي أصبح يمتلك كوادر قوية مثل قناة الجزيرة بشقيها العربي و الانجليزى ووجود أيضا وكالات أنباء فلسطينية خاصة مثل راماتان كنت تذيع الحرب على الهوار 24 ساعة ومعظم الفضائيات كانت بتنقل من راماتان
تبع مين ؟
مهيش حكومية لا تبع حماس ولا عباس ناس مهنيين كانوا مرابطين فى المستشفى وبث للحرب 24 ساعة
هل كان فى تنسيق بين المنظمات ؟
أنت بتسلم نفسك للمستشفى احنا تخصصنا كذا وهما يوزعوك كل مجموعة من الدكاترة معاهم واحد مساعد للمجموعة من الفلسطينيين واحد فلسطينى ادارى والشاب اللى كان معانا عمل واجب جامد جدا . أى حد عايز حاجة مثلا يغير فلوس بطارية أو سماعة موبايل يعنى السماعة كانت مهمة جدا معظم الناس كانت تستخدم الموبايل كراديو وتسمع اذاعة اسرائيل واذاعة الأقصى لأن التلفزيون كن يشوش أحيانا ويتوقف أحيانا أخرى الراديو لأ فكان ضرورى سماعة الموبايل عشان تعرف الأخبار. الجروح اللى حضرتك شفتها ؟
الجروح صعبة معظم الناس اصابات متعددة يعنى الشخص اللى جاى باصابة واحدة كان نادر جدا وكان يتعالج فى الاستقبال ويروح .
تلاقى اصابة فى الرأس والرقبة وتلاقى واحد رجليه مقطوعين واديه مقطوعة يعنى أشياء سبحان الله معظم الناس مضروبين من مسافات قريبة ، وتأثير الضرب جامد أكتر الاصابات كانت بسبب قذائف الدايم DIME .
انا شفت رجلين مفصولين خالص وبعضهم متعلق من حتة جلدة او عضلة او وتر ما كنش بتحتاج مجهود كبير علشان تفصل رجله يعنى كانت شغلة الجراحين انهم يظبطوا الاسطنبة علشان أى أجهزة مساعدة بعد كده شكل الاصابات كان فظيع شفنا أشكال عجيبة من الحروق
أول مرة حضرتك تشوفها ؟
أول مرة أشوفها بالشكل ده يعنى سمعت عنها لكن أول مرة على الواقع وبالبشاعة دى .
الروح المعنوية للمصاب ؟
الشعب كله مقتنع انه بيحارب فالشعب كله مدرك ثمن المقاومة بعض المصابين كان نفسه يكون من الشهداء ونفسه ان ربنا ينعم عليه بالشهادة يعنى رضا مسيطر على الجرحى كله راضى وكله مطمئن أهالى الضحايا ؟ بالتأكيد فى صعوبة وفى ناس امتعضت وحزنت لكن مش الهلع المصحوب بالندم . أه فى تأثر لكن مش ندم ولا ولولة مش مستكتر اصابته على تحرير الأرض ، حزن مفهوم فى إطار محكوم مش فى اطار الغضب العارم أو التذمر شعور غضب موجه للعدو مش ندم.
هل معبر رفح كشكل بناء يا دكتور يسمح بمرور البضائع؟
كشكل بناء : المعبر يعدى ترله أنا شفت الترلات ماشية فيه مستريحة وخد دى كمان بعض الترلات بتدخل غزة عن طريق معبر كرم أبو سالم (تحت السيادة الاسرائيلية ) وتدخل غزة وتتفضى عند رفح وترجع فاضية من معبر رفح المصرى الفلسطينى يعنى جغرافية المعبر تعدى قافلة جمال مش جمل واحد.
المساعدات الغذائية ؟
أثناء المعركة اسرائيل أحرقت مخازن الأنروا وده بيمثل أكل حوالى 50 % من شعب غزة ماكنش فى حاجة بتعدى من معبر رفح غير الأدوية والمساعدات الطبية كانت المساعدات الغذائية تعدى من معبر كرم أبو سالم بواسطة الأنروا .
الإعلام المصري ؟
بعض رجال الاعلام المصرى بيمروا بحالة تخبط ذهنى وارتباك ونسأل الله لهم العافية هم يضعون أنفسهم مكان ما اختاروا لها.
أ.مكرم محمد أحمد نقيب الصحفيين اتكلم وقال ان حماس سحبت منهم الدروع اللى كانت مع الصحفين وقبضت عليهم ؟
هو كتب مقالة يوم الأحد بعد ما احنا جينا عنوانها هزيمة حماس فى غزة فبالليل أنا كتب له سيادة النقيب لقد كنا هناك والشعب الفلسطينى قد انتصر .
محاولة أن يصور الاعلام أن المعركة بين اسرائيل وحماس هى نوع من الحرب الإعلامية.
قرار عدم مد الهدنة لم تأخذه حماس وحدها بل بالتوافق مع جميع الفصائل وكل الفصائل كانت مستعدة لهذه الحرب وتم توزيع السلاح على بعضهم البعض وتنسيق كامل بينهم ، المجموعة الفلانية عليها المكان الفلانى وكل مجموعة بقى لا يأتى العدو من جانبها ، تنافس فى الدفاع عن غزة ونشوف مين هيموت اسرائيليين أكتر فمش حماس اللى حاربت لوحدها ولا حماس هى اللى اسرائيل بتحاربها لوحدها الكنائس ضربت زى ما المساجد ضربت ،الرصاص ما فرقش ان ده حمساوى ولا فتحاوى ، الناس كلها تحملت ، رجالة المقاومة كلها حاربت ، كل الفلسطينيين دفعوا وكلهم انتصروا ، الشعب الفلسطينى كله انتصر.
الكهرباء ؟
مهيش موجودة فى معظم المدينة لكن المستشفى ليها محطة خاصة بيها غير المحطة العامة
المياه ؟
كانت موجودة فى المستشفى
المؤسسات ؟
كل حاجة كانت شغالة حتى ان الحرب لما بدأت يوم 27/12/2008 الناس مرتباتها يوم 1/1/2009 وصلت للبيت . الحكومة وصلت المرتبات لكل مواطن .
المرافق الحيوية كلها شغالة الناس كلها عندها عيش لو تذكر موقف الطابور مفيش حد مش لاقى عيش أعتقد انها تجربة فى الصمود لها احترامها. شعب بالحجم ده فى المنطقة الصغيرة دى وتحت حصار موافق عليه العالم كله تقريبا . شئ سيكتب فى التاريخ بأحرف من نور .
كان فى حاجة حضرتك متوقعها طلعت أسوأ ؟
كنت متصور ان بعد اسبوعين من الحرب المستشفيات حالتها هتبقى سيئة ويمكن ما تلاقيش اللى انت محتاجة وانت شغال لكن لقيت الوضع أحسن مما تخيلت . دولاب العمل كل فرد فيه من وزير الصحة لأصغر عامل فى المستشفى كل واحد قايم بدوره . شوف انت راجل وزير صحة يمر على المستشفيات راكب عربية الاسعاف ورا مش جنب السواق .
المعركة كانت تدار بشكل أسطورى على جميع المستويات سواء شعب أو حكومة.
أقصد حاجة أقل ؟
كل حاجة أحسن مما تخيلت يعنى وأنا صغير شهدت حرب 67 و 73 لقيت الشعب الفلسطينى زى ما كانت مصر فى أحسن حالاتها فى 73 نفس المنظر الممتاز الانسان بينسى نقائصه كلها وبيطلع كل صفاته الجميلة الناس نبرة صوتها طبيعية مفيش مشاكل . طابور العيش فى عز الضرب زى طابور اوتوبيس فى دولة أوروبية . السلوك اليومى راقى جدا فى ظروف عصية جدا , كل تصوراتى السيئة لم أجد لها أثر بل وجدت أحسن مما توقعت ، أتمنى لو الحدود اتفتحت أخد العيال ونروح نصيف فى غزة.
أكتر موقف أثر فى حضرتك ؟
الأم المحترقة مش عارف أقول ايه على هذا الظلم دى شاهد مجسم على بشاعة عدو يدعى أنه هارب من بشاعة .
شفنا محرقة حقيقية أم و5 أطفال أنا كل اللى عدتهم 4 بالعافية لكن المسعفين أكدوا انهم 5 .
شاب من الجرحى زملاءنا الجراحين حوالى 8 ساعات بيحاولوا معاه هو كان فى تهتك فى الكبد وحاولوا يسيطروا على النزيف واعتقدوا انهم سيطروا عليه وبعد ما قفلوه لقو ضغطه بيوطى ففتحوه تانى لقوه بينزف مقدروش يسيطروا على النزيف و لقي الله شهيدا ودى من الحاجات المؤلمة لأن أصعب حاجة على الجراح إن يموت منك عيان على الترابيزة خصوصا من سبب يمكن علاجه من المنطق إن أى نزيف ممكن توقفه لكنهم ماقدروش ، شئ نسأل الله ألا يريه لأى جراح .
رسالة توجهها للفلسطينيين أو للمصريين ؟
المنظر اللى شفته ان الشعب المتحد حول هدف يستطيع أن يقهر المستحيل وأعتقد ان احنا محتاجين فى مصر الأمة كلها تركز على أهداف عليا ومحددة علشان نقدر نتحرك بهذا البلد إلى الأمام لأن ما نحن فيه من أحوال متردية يحتاج فعلا أن نكون متماسكين أكثر . مصر لا ينقصها امكانيات ولا ينقصها البشر لكن ازاى ندير هذه الامكانيات البشرية والمادية .
الشعب الفلسطينى توحد فاستطاع أن يصمد أمام اسرائيل لمدة 3 أسابيع عام 2009 واحنا كدول عربية فى خلال 6 أيام فى 67 كنا مستسلمين .
أكيد كان فى خلل فى قمة هرم السلطة نزاع بين رئيس الجمهورية والمشير والمفروض ان الحرب ما كانتش على غفلة دا احنا فى 15 مايو 67 كنا بنقول أهلا بالمعارك واللى مش عاجبه يشرب من البحر وطالبنا بخروج القوات الدولية يعنى احنا نكاد نكون البادئين بإعلان الحرب وفى نفس الوقت ما استحملناش لكن هؤلاء فى 2009 بصراحة شئ عجيب وحدة الشعوب تصنع المستحيل.
أى أنه دون رؤية محددة واضحة ويجتمع عليها الشعب سنظل نراوح مكاننا إلى مدى لا يعلمه إلا الله
نصيحة للطلبة ؟
محدش يستقل نفسه وكل واحد لازم يبص لنفسه على انه بشر بما ميزه الله به من إمكانيات ضخمة ويبحث عن هذا الكنز وكل واحد يقدر يكون أحسن من نماذج كتير قدامه يشار لها بالبنان والشعب الفلسطينى الأسلحة اللى طورها كلهم مهندسين صغيرين شباب 22 -25 سنة دول لو كانوا استقلوا نفسهم وماكنوش اتحركوا ما كانتش المقاومة عملت اللى عملته . هذه لكل الطلبة لكن هل من نصيحة لطلبة طب ؟ اجتهدوا بلدنا مصر تحتاج الى عدد أكثر من الأطباء وكذلك منطقنا العربية واحرصوا على تنمية قدراتكم العلمية.
جزاكم الله خيرا أستاذى دكتور ابراهيم
وجزاكم مثله

إلى هنا انتهت جلستي مع استاذى دكتور إبراهيم عراقي التى أتمنى أن تتكرر لكن في ظروف أفضل وأحداث أكثر سعادة.

ورحلت هديل......

" كل نفس ذائقة الموت وإنما توفون أجوركم يوم القيامة فمن زحزح عن النار وأدخل الجنة فقد فاز وما الحياة الدنيا إلا متعا الغرور "

الحياة ققطار مسرع دون توقف ممتلئ بالبشر من كل لون وشكل بعضهم ركب مبكرا وبعضهم ركب متأخرا منهم من هو كبير فى السن ومنهم من هو صغير فى السن كل يعلم أن محطة نزوله آتية لا ريب ولكن متى ؟ لايعلم أين ؟ لا يعلم

لكنه سينزل ودون عودة فالنزول هو الموت

نعم هادم اللذات ومفرق الجماعات .

بالأمس القريب رحلت أختنا هديل . نعم نزلت من القطار ونزل معها عدد من الناس فى حادث أليم نتحمل وزره جميعا

نزلوا من القطار وبقينا نحن فى القطار ننتظر دورنا فمنا من يعمل ويستعد للحظة نزوله ومنا من لم يعبأ بما حدث ومنا من نسى أنه سينزل أصلا

صراحة أنا عاجز عن كتابة أى كلمة رثاء فى أختنا لذا سأنقل كلمات أختنا د/ هديل فى رثاء احدى زميلاتها العام الماضى فلا أصدق من رثاء الانسان لنفسه ولعلها أحست بقرب الرحيل فعبرت عن ذلك وهى ترثى زميلتها .

"ورحلت دينا
حبيبتى لو عدتى إلينا لتقولى لنا ولو كلمه...ماذا تقولين ؟؟ كلمة شوق ام وداع ام ماذا ؟
رحلتى الى رب غفور رحيم فأخبرينى كيف السؤال ؟؟؟ وكيف الحساب ؟؟
نعم رب غفور رحيم ولكن غرنى عفوه وحلمه
فكيف أجيب عن سؤاله وانا لم أفكر يوما فى مراقبته لى ؟؟؟
أعيش وسط دوامة أهلى .. أصحابى .. دراستى .. امتحاناتى ... مستقبلى ...ونسيت اليوم الذى ستسقط فيه ورقتى
اليوم الذى سيزورنى فيه ذلك الزائر بلا استئذان ليقطع حبل حياتى واحلامى
أصبحت الاّن أشعر أنه يدق على بابى .. يقول لى لا تشيحى وجهك عنى حينما تذكرينى
لا تهربى كثيرا فانى ملاحقك
حبيبتى أخبرينى .. هل اظل احلم بحياتى ام اقطع التفكير واستعد ليوم الرحيل ؟؟
ربما كان رحيلك تضحية لا ارادية منك لتذكرينا بقرب اللقاء
لتذكرينا بخالقنا الذى طال زمن اعراضنا عنه . لتذكرينا بأنه هو الذى بدأنا واليه المصير
ولكننا نسينا البداية ونسينا النهاية وظننا الخلود وانطلقنا فى الدنيا تحركنا يمنة ويسرة بلا هدف نسعى من أجله
لكن يقينا هناك شىء تحرك فى داخلنا ... رغبة ملحة تدعونا الى الرجوع تدعونا إلى القرب من الله الذى طالما بعدنا عنه
ولطالما بارزناه بالمعاصى ونحن افقر الفقراء اليه وهو اغنى الاغنياء عنا
الهي .. أرسلت إلينا رسالة في وفاة رفيقتنا
فمنا من مرت عليه بلا تأثير ولم يشعر بأى رغبة في الوقوف مع النفس
ومنا من حزن يوما أو يومين أو أسبوع وقرر التغيير ثم عاد كما كان
ومنا من قرر الرجوع والوقوف على بابك ويقول
( ببابك لن أغادره )
الهى تعبت من البعد عنك والهروب منك معى كل شىء ولا املك شىء
كنت ابحث عن السعاده فى معصيتك ولكنها كانت سعادة زائفة لم تزيدنى الا حزنا وشقاءا
اضحك والعب والهو وعندما اخلو بنفسى اريد ان اصرخ واقول
( ما خلقت لهذا )
لكنى اعلم ان السعادة الحقيقية هي في طريقك لذا آن الأوان أن ارجع إليك بعد طول شقاء
سلكت كل الطرق بحثا عن السعادة فلم اجدها
لكن اليوم ربى مسحت غشاوتى وبدأت بالقلب الصفي أراك
الهى .... يا من أنت ارحم بنا من أمهاتنا .. يا من تسمع شكوانا ونجوانا
يا من تطاع فتشكر وتعصى فتغفر
اغفر لنا ما مضى من زلاتنا وخذ بأيدينا إليك ولا تحرمنا من رضاك عنا"

تلك كلماتها نسألكم الدعاء لها ولأموات المسلمين فكلها أيام طالت أو قصرت ونلحق بهم فقد ركبنا القطار وانطلق بنا ومحطة النزول اقتربت.

آه يا غزة......................

أحل الكفر بالإسلام ضيما يطول عليه للدين النحيب

فحق ضائع وحمى مباح وسيف قاطع ودم صبيب

وكم من مسلم أمسى سليبا ومسلمة لها حرم سليب

وكم من مسجد جعلوه ديرا وعلى محرابه نصب الصليب

أمور لو تأملهن طفل لطفل فى عوارضه المشيب

أتسبى المسلمات بكل ثغر وعيش المسلمين إذا يطيب

أما لله والإسلام حق يدافع عنه شبان وشيب

فقل لذوى البصائر حيث كانوا أجيبوا الله ويحكم أجيبوا

طبعا كلنا شفنا الإجرام اللى حصل ولسه بيحصل لحد اللحظة دى فى غزة

حتى كتابة هذه السطور 290 شهيد وأكثر من 700 جريح

أنا بس عندى سؤال واحد الناس دى دمها في رقبة مين ؟؟؟

طبعا كله هيقول الحكام العرب وأمريكا واسرائيل ماشى كل ده كلام كويس بس أنا ليا رأى بسيط فى ترتيب المسؤلية المسؤل عن اللى حصل رقم 1 حسنى مبارك او ما يسمى بالرئيس المصرى والوزير الحقل أبو الغطيط مش الغيط

رقم 2 الكائن التانى اللى اسمه محمود عباس واللى خرج المستشار بتاعه بعد القصف وبيحمل حماس المسؤلية عن اللى حصل بسبب تصرفاتها الطايشة

رقم 3 ومحدش يزعل منى هو الشعب المصرى اللى ساكت عن اللى بيحصل

الشعب المصرى اللى ساكت عن حصار شعب غزة

الشعب المصرى الجبان والحجة بتاعته عايز أربى العيال وأجرى ورا لقمة العيش فلا هو ربى العيال ولا هو لقى لقمة العيش

بعد كده بقى ممكن نقول بقيت حكام العرب مسؤلين.

طلب واحد بس مفيش حد فينا سأل نفسه وهو داخل ينام امبارح ال290 اللى استشهدوا وال700 جريح بيدعوا على مين ؟

أنا متأكد انهم ما بيدعوش على أمريكا واسرائيل وإنما بيدعوا علينا إن إحنا شايفينهم وساكتين يا ترى كل واحد فينا يوم القيامة لما يقف قدام ربنا ويسأله هو عمل إيه للمسلمين اللي في غزة هنرد نقول ايه ؟

أنا مش عارف هنقول ايه

بلاش دى

حد فينا تخيل يوم القيامة وال290 شهيد وال700 جريح جايين ماسكين في رقبته وبيقولم يا رب المسلم ده خذلنا يا ترى هنرد نقول ايه يا رب ما كانش قدامى حاجة أعملها ولما ربنا يرد عليك لأ كان قدامك انك تتحرك وتثور سكت ليه ؟ هترد تقول ايه ؟

كنت ببربى العيال وبدور على لقمة العيش فيرد عليك رب العزة أما علمت أنى أنا الرازق وأنا من يحميك .

هترد تقول ايه ؟؟؟؟؟؟؟؟؟؟؟؟؟؟؟

أنا مش عارف هأرد أقول ايه فلو حد عارف يقوللى …………….

واجب عملى نتواصى بيه

1 – التوبة الى الله من كل الذنوب صغائر كانت أو كبائر

2- الدعاء لأهلنا فى غزة

3- التبرع

4- مقاطعة العدو الصهيوني والأمريكي وكل من عاونهم

5- مطالعة القضية ودراستها وفهم أبعادها العقائدية والجغرافية والسياسية

6- نشر القضية بين الأهل والأصدقاء كل شخص على قد دائرة معارفه

كل ده علشان حاجة واحدة بس علشان يوم القيامة لما كل واحد فينا يقف قدام ربنا سبحانه وتعالى يمكن يعفو عنه ويسامحه على تقصيره فى حق اخوانه ويمكن اخواننا يسامحونا على سكوتنا

يارب انا نشكو اليك بيوتا دمرت ورجالا قتلت ونساء رملت وأطفالا يتمت

العيد فرحة

أولا : كل سنة وانتم طيبين وان شاء الله السنة الجاية نكون في الحج

ثانيا:

العيد فرحة وأجمل ما فيها هو صلاة العيد اللي بنقابل فيها كل حبايبنا ده في أى عيد سواء الفطر الأضحى

عيد الأضحى بقى بيتميز بحاجة حلوة قوى وهى الأضحية بصراحة بحس إن دي أحلى حاجة في العيد ومن وأنا صغير بحب أروح عند الجزار أشوف الدبح ويا سلام على منظر العجل وهو بيتجر وبيقاوم والجزارين بيثبتوه

وتلاقى جزار جايب سكينة حامية جدا وهوب بسم الله الله أكبر ويعدى السكينة مرة واحدة على رقبة الدبيحة وفجأة تلاقى نافورة دم طالعة ويبدأ يقاوم بعنف أكتر لدرجة أنه ممكن يوقع كل اللي حواليه وتشوف الدم بيخر وعمال تسمع صوت الهوا اللي داخل وخارج بعد ما دمه اتصفى بجد مشهد رائع جدا . لحد هنا كويس

اللي مش كويس بقى هو إن أنا مش عارف ليه دايما بأتخيل نفسي مكانه وسكينة الجزار بتقطع القصبة الهوائية والشريان السباتى – carotid – والدم بيندفع من رقبتى ساعتها ضربات قلبى بتزيد وبحس بقشعريرة باردة تسرى في جسمى كله – حلوة الحتة اللي فاتت دي- وبتنفس بسرعة لكن برضه مع كل ده تلاقينى مبتسم وماسك الكاميرا وعمال أصور اللي بيحصل وبينى وبين نفسى بقول " الحمد لله الذي سخر لنا هذا "

مش عارف ليه كان نفسى أنام وأحلم ان البقر بيحكم العالم وانه هيضحى بالبنى آدمين وأشوف مجموعة أبقار ماسكين واحد – طبعا تخين ومليان علشان يلاقو حاجة ياكلوها – ويروحو يوزنوه ويلاقوه 100 كيلو قايم وياخدوه ويكتفوه وواحدة منهم تيجى بالسكينة ناحيته وهو بيقاوم ويقاوم لكن.................. انتم عارفين الباقى

أكيد هيصحى من النوم.

بجد الحمد لله انه خلقنا بشر

معلش نكدت عليكم شوية بقولكم ايه بلاش وجع دماغ

العيد فرحة وأجمل فرحة .... تجمع شمل قريب وبعيد

وكل سنة وأنتم طيبين

كوبى بست

السلام عليكم
عادة مبحبش أنقل حاجة حد كاتبها
بس بجد مع أحمد مطر الوضع مختلف
مش عارف ليه لما شفتها نقلتها علطول كوبى بست

جس الطبيب خافقي
وقال لي :
هل هنا الم ؟
قلت له : نعم
فشق بالمشرط جيب معطفي
وأخرج القلم ؟
هز الطبيب رأسه..ومال وابتسم
وقال لي :
ليس سوي قلم
فقلت : لا ياسيدي
هذا يد وفم
رصاصة ودم
وتهمة سافرة ...تمشي بلا قدم
الشاعر/ احمد مطر

ليس لنا فروع أخرى

أول ما شفت اللوحة دي متعلقة عندنا في الكلية حسيت إنى شفت أو سمعت الكلام ده قبل كده والحمد لله افتكرت فين

الرئيس محمود عباس :منظمة التحرير الفلسطينية هي الممثل الشرعي والوحيد للشعب الفلسطيني فيبدو إن الكلية عندنا قررت تتعامل مع الطلبة بمنطق الشرعية بتاع حركة فتح

بس بصراحة انا كان نفسى تتكتب بأسلوب أفضل وهو إن إدارة الكلية وإدارة رعاية الشباب تحذر الطلاب حيث أن اتحاد الطلاب ليس له فروع أخرى