آه يا غزة......................

أحل الكفر بالإسلام ضيما يطول عليه للدين النحيب

فحق ضائع وحمى مباح وسيف قاطع ودم صبيب

وكم من مسلم أمسى سليبا ومسلمة لها حرم سليب

وكم من مسجد جعلوه ديرا وعلى محرابه نصب الصليب

أمور لو تأملهن طفل لطفل فى عوارضه المشيب

أتسبى المسلمات بكل ثغر وعيش المسلمين إذا يطيب

أما لله والإسلام حق يدافع عنه شبان وشيب

فقل لذوى البصائر حيث كانوا أجيبوا الله ويحكم أجيبوا

طبعا كلنا شفنا الإجرام اللى حصل ولسه بيحصل لحد اللحظة دى فى غزة

حتى كتابة هذه السطور 290 شهيد وأكثر من 700 جريح

أنا بس عندى سؤال واحد الناس دى دمها في رقبة مين ؟؟؟

طبعا كله هيقول الحكام العرب وأمريكا واسرائيل ماشى كل ده كلام كويس بس أنا ليا رأى بسيط فى ترتيب المسؤلية المسؤل عن اللى حصل رقم 1 حسنى مبارك او ما يسمى بالرئيس المصرى والوزير الحقل أبو الغطيط مش الغيط

رقم 2 الكائن التانى اللى اسمه محمود عباس واللى خرج المستشار بتاعه بعد القصف وبيحمل حماس المسؤلية عن اللى حصل بسبب تصرفاتها الطايشة

رقم 3 ومحدش يزعل منى هو الشعب المصرى اللى ساكت عن اللى بيحصل

الشعب المصرى اللى ساكت عن حصار شعب غزة

الشعب المصرى الجبان والحجة بتاعته عايز أربى العيال وأجرى ورا لقمة العيش فلا هو ربى العيال ولا هو لقى لقمة العيش

بعد كده بقى ممكن نقول بقيت حكام العرب مسؤلين.

طلب واحد بس مفيش حد فينا سأل نفسه وهو داخل ينام امبارح ال290 اللى استشهدوا وال700 جريح بيدعوا على مين ؟

أنا متأكد انهم ما بيدعوش على أمريكا واسرائيل وإنما بيدعوا علينا إن إحنا شايفينهم وساكتين يا ترى كل واحد فينا يوم القيامة لما يقف قدام ربنا ويسأله هو عمل إيه للمسلمين اللي في غزة هنرد نقول ايه ؟

أنا مش عارف هنقول ايه

بلاش دى

حد فينا تخيل يوم القيامة وال290 شهيد وال700 جريح جايين ماسكين في رقبته وبيقولم يا رب المسلم ده خذلنا يا ترى هنرد نقول ايه يا رب ما كانش قدامى حاجة أعملها ولما ربنا يرد عليك لأ كان قدامك انك تتحرك وتثور سكت ليه ؟ هترد تقول ايه ؟

كنت ببربى العيال وبدور على لقمة العيش فيرد عليك رب العزة أما علمت أنى أنا الرازق وأنا من يحميك .

هترد تقول ايه ؟؟؟؟؟؟؟؟؟؟؟؟؟؟؟

أنا مش عارف هأرد أقول ايه فلو حد عارف يقوللى …………….

واجب عملى نتواصى بيه

1 – التوبة الى الله من كل الذنوب صغائر كانت أو كبائر

2- الدعاء لأهلنا فى غزة

3- التبرع

4- مقاطعة العدو الصهيوني والأمريكي وكل من عاونهم

5- مطالعة القضية ودراستها وفهم أبعادها العقائدية والجغرافية والسياسية

6- نشر القضية بين الأهل والأصدقاء كل شخص على قد دائرة معارفه

كل ده علشان حاجة واحدة بس علشان يوم القيامة لما كل واحد فينا يقف قدام ربنا سبحانه وتعالى يمكن يعفو عنه ويسامحه على تقصيره فى حق اخوانه ويمكن اخواننا يسامحونا على سكوتنا

يارب انا نشكو اليك بيوتا دمرت ورجالا قتلت ونساء رملت وأطفالا يتمت

العيد فرحة

أولا : كل سنة وانتم طيبين وان شاء الله السنة الجاية نكون في الحج

ثانيا:

العيد فرحة وأجمل ما فيها هو صلاة العيد اللي بنقابل فيها كل حبايبنا ده في أى عيد سواء الفطر الأضحى

عيد الأضحى بقى بيتميز بحاجة حلوة قوى وهى الأضحية بصراحة بحس إن دي أحلى حاجة في العيد ومن وأنا صغير بحب أروح عند الجزار أشوف الدبح ويا سلام على منظر العجل وهو بيتجر وبيقاوم والجزارين بيثبتوه

وتلاقى جزار جايب سكينة حامية جدا وهوب بسم الله الله أكبر ويعدى السكينة مرة واحدة على رقبة الدبيحة وفجأة تلاقى نافورة دم طالعة ويبدأ يقاوم بعنف أكتر لدرجة أنه ممكن يوقع كل اللي حواليه وتشوف الدم بيخر وعمال تسمع صوت الهوا اللي داخل وخارج بعد ما دمه اتصفى بجد مشهد رائع جدا . لحد هنا كويس

اللي مش كويس بقى هو إن أنا مش عارف ليه دايما بأتخيل نفسي مكانه وسكينة الجزار بتقطع القصبة الهوائية والشريان السباتى – carotid – والدم بيندفع من رقبتى ساعتها ضربات قلبى بتزيد وبحس بقشعريرة باردة تسرى في جسمى كله – حلوة الحتة اللي فاتت دي- وبتنفس بسرعة لكن برضه مع كل ده تلاقينى مبتسم وماسك الكاميرا وعمال أصور اللي بيحصل وبينى وبين نفسى بقول " الحمد لله الذي سخر لنا هذا "

مش عارف ليه كان نفسى أنام وأحلم ان البقر بيحكم العالم وانه هيضحى بالبنى آدمين وأشوف مجموعة أبقار ماسكين واحد – طبعا تخين ومليان علشان يلاقو حاجة ياكلوها – ويروحو يوزنوه ويلاقوه 100 كيلو قايم وياخدوه ويكتفوه وواحدة منهم تيجى بالسكينة ناحيته وهو بيقاوم ويقاوم لكن.................. انتم عارفين الباقى

أكيد هيصحى من النوم.

بجد الحمد لله انه خلقنا بشر

معلش نكدت عليكم شوية بقولكم ايه بلاش وجع دماغ

العيد فرحة وأجمل فرحة .... تجمع شمل قريب وبعيد

وكل سنة وأنتم طيبين

كوبى بست

السلام عليكم
عادة مبحبش أنقل حاجة حد كاتبها
بس بجد مع أحمد مطر الوضع مختلف
مش عارف ليه لما شفتها نقلتها علطول كوبى بست

جس الطبيب خافقي
وقال لي :
هل هنا الم ؟
قلت له : نعم
فشق بالمشرط جيب معطفي
وأخرج القلم ؟
هز الطبيب رأسه..ومال وابتسم
وقال لي :
ليس سوي قلم
فقلت : لا ياسيدي
هذا يد وفم
رصاصة ودم
وتهمة سافرة ...تمشي بلا قدم
الشاعر/ احمد مطر

ليس لنا فروع أخرى

أول ما شفت اللوحة دي متعلقة عندنا في الكلية حسيت إنى شفت أو سمعت الكلام ده قبل كده والحمد لله افتكرت فين

الرئيس محمود عباس :منظمة التحرير الفلسطينية هي الممثل الشرعي والوحيد للشعب الفلسطيني فيبدو إن الكلية عندنا قررت تتعامل مع الطلبة بمنطق الشرعية بتاع حركة فتح

بس بصراحة انا كان نفسى تتكتب بأسلوب أفضل وهو إن إدارة الكلية وإدارة رعاية الشباب تحذر الطلاب حيث أن اتحاد الطلاب ليس له فروع أخرى

Back to school

خبر وتعليق

أولا: الحبس شهرين للصحفى ابراهيم عيسى فى قضية صحة الرئيس

التعليق : أناشد السيد الرئيس أن يكف عنا سيل الحريات المندفع لأن بصراحة احنا معدناش مستحملين حرية أكتر من كده

ثانيا :السعودية وقطر والامارات والوقف السنى فى العراق تعلن غدا أول أيام عيد الفطر
مصر تعلن أن غدا هو المتمم لشهر رمضان

التعليق : سلم لى على الوحدة العربية والاسلامية

ثالثا:خبرين ورا بعض من الجزيرة

مصر تعلن عن الافراج عن الرهائن بواسطة قوة مصرية خاصة
السودان تعلن الافراج عن الرهائن بواسطة قوة سودانية خاصة

التعليق : أصدق مين ؟؟؟؟؟؟؟؟؟؟؟؟؟؟؟؟

عميا

الحب شعور جميل و إحساس رائع وأنا بأعتبره من أفضل نعم ربنا علينا .

حد معترض؟

أكيد لأ.

عادى جدا إن في حاجات معينة بتتحب يعنى عادى مثلا إني أقول لك إني بحب فلان أو بحب الأكلة الفلانية أو المكان الفلاني كل ده عادى ومقبول وجيد وجيد جدا وامتياز كمان الغريب بقى انك تحب حاجة مش ممكن تتحب مثلا أنا وأنا في ثانوي كنت بحب الأكسجين مش عارف بحبه ازاى بس كنت زى ما تقول كده بحترمه وبتعامل معاه كأنه واحد صاحبي وإذا غلطت في سؤال ولا حاجة أزعل منه وهكذا حتى لما دخلت الكلية مش عارف ليه حبيت الأورطى طبعا مش هو بس لكن هو رقم واحد .

أحيانا بحس إني عبيط مجنون بس برضه بحبه.

لحد دلوقتى مش لاقى تفسير للموضوع ده فلو حد عنده تفسير يا ريت يفهمني ويعرفني هو أنا بس اللي كده ولا دى حالة عادية .

على العموم أنا دلوقتى متأكد إن مراية الحب مش عامية بس لأ دي عاميه و طرشه وخرسه وعندها تخلف عقلي كمان صح ولا أنا غلطان؟؟؟؟

الاعتراف بالحق فضيلة

من أصعب الحاجات على أى إنسان أنه يعترف أنه غلطان...
ده فى الوضع الطبيعى وأقصد بالوضع الطبيعى هنا إن اللى انت بتعتذر له وتعترف له بخطأك راسه براسك يعنى واحد صاحبك مثلا أو حتى هو أكبر منك يعنى تعتذر لوالدك أو أستاذك شوف بقى بيبقى الوضع صعب إزاى....
الأصعب بقى إن اللى انت بتعتذر له شخص أقل منك سواء أصغر منك فى السن
أوأقل منك فى الدرجة الوظيفية يعنى مثلا صعب إنك تعتذر لأخوك
الصغيرو لو انت أستاذ صعب تعتذر لطالب عندك أو لو انت أب صعب تعتذر
لابنك طب ده ليه ؟
علشان معندناش ثقافة الاعتذار أو الاعتراف بالخطأ.

أنا بس نفسى أعرف ليه مفيش أب مثلا بيعتذر لابنه؟؟!!
أو مدرس لطالب عنده أنا عارف ان شكلها غريب بس ايه المشكلة فى كده؟؟!!
هل لما أستاذى يعتذرلى دى حاجة وحشة فى حقه؟؟!!
أنا شايف انها عادى أنا عن نفسى هأحترم الراجل ده قوى.
كلمة أنا اسف بتحل مشاكل كتير وأكيد كلنا عارفين كده طب ليه بقى ما بننفذش؟؟!!
أتمنى ان كل واحد فينا يحترم الاخر ويحاول ما يغلطش فى حقه ولو غلط يعتذر له مهما كانت الفروق بينهم و أكيد هنستريح كلنا وأعتقد ان ده جزء من تحمل المسؤلية..
بجد أنا اسف لأى حد غلطت فى حقه و بجد بأطلب منه السماح

أحلاااااااااااااام

كوابيس وأحلام وحاجات غريبة نفسنا نعرف هي إيه وأسبابها و إزاى نخليها متعة لو ينفع نتحكم في أحلامنا صح ولا لأ ؟؟؟؟

نبدأ من الأول :

النوم هو لغز محدش عارف حله وحتى الآن لم يستطع العلماء معرفة كل شئ عنه أو حتى تفاصيل كافية . كل اللي عرفوه هو شوية معلومات سجلوها بحبة أجهزة أه هى عرفتنا حاجات كويسة بس لسة كتير برضه عموما هنشوف إيه اللي موجود ونعرفه لحد ما تفرج .

النوم : هو حالة قابلة لأن تنعكس من توقف التفاعل الحسى الحركي مع البيئة وعادة ما يكون مرتبط بالراحة والسكون

وظائف النوم :

1) الذاكرة حيث يتم تثبيت المعلومات في الذاكرة الدائمة أثناء النوم

2) الحفاظ على الطاقة حيث أنه أثناء النوم يقل استهلاك الأكسجين والطاقة عموما

3) استراحة للمخ حيث أن النوم هو فترة نمو المخ والجسم حيث يزداد إفراز هرمون النمو

4) وظائف مناعية

إزاى بنقيس النوم أو إزاى بندرسه :

يتم قياس نشاط بعض الأعضاء عن طريق جهاز متعدد الوظائف :

1- رسام المخ الكهربى لقياس النشاط الكهربى للمخ

2-رسام العين الكهربى لقياس النشاط الكهربى وحركة العينين

3-رسام العضلات الكهربى لقياس حالة العضلات من الانقباض والانبساط

وجد أن النوم يتكون دورات

كل دورة تتكون من مرحلتين هما

1- REM(Rapid Eye Movement) أو الحركة السريعة للعينين

2- NREM (non Rapid Eye Movement) والتى بدورها تتكون من 4 مراحل 1و2و3و4

تستغرق دورة النوم الواحدة حوالى 90-100 دقيقة

الشخص البالغ يكمل حوالى 4-5 دورات فى الليلة الواحدة

عامة NREM يشكل حوالى80 % من إجمالى وقت النوم

حوالى 20 % من إجمالى وقت النوم REMو

رغم أن NREM يشكل حوالى 80% من إجمالى وقت النوم إلا أن الشخص غالبا يستيقظ فى مرحلة REM وذلك لأن النوم فيها يكون أقل عمقا ويسهل إيقاظ الشخص فيها

مراحل دورة النوم :

الشخص الطبيعى يحتاج من 15 -20 دقيقة حتى يدخل في النوم
خلال ال45 دقيقة التالية يمر الشخص عبر المراحل 1و2و3و4 من NREM

بعد حولى 45 دقيقة بعد المرحلة 4 يدخل النائم أول مرحلة REM

مع مرور الوقت أثناء النوم تطول مدة مرحلة الREM والمراحل 3و4 من ال NREM تبدأ تختفى وبذلك يصبح نوم الشخص أخف ويبدأ في الأحلام .

كما قلنا غالبا يتم إيقاظ الإنسان في مرحلة ال REM وهى التى يتم فيها علشان كده بنصحى في نص الحلم وحتى لو نمنا تانى عشان نكمله ما ينفعش وما يكملش لأن لما بنام تانى بندأ الدورة من الأول مش بنكمل الدورة .

نتكلم عن مرحلة لوحدها :
NREM أو لها اسم تانى slow wave sleep وفيها بيقل نشاط العضلات ولكن بيفضل أعلى من REM بيقل معدل التنفس وبيكون منتظم وبتنخفض درجة حرارة الجسم وبيقل وعى بالبيئة الخارجية ويتحول باتجاه التفكير التخيلى لا يمكن الاحساس بالمؤثرات الخارجية عدا بعض المؤثرات أحيانا يتم حل بعض المشكلات وحفظ المعلومات المتعلمة حديثا الأحلام في المرحلة دي بتبقى بسيطة ومدها قصيرة ومش واضحة (أبيض وأسود) وملهاش معنى ومن السهل جدا نسيانها لما تصحى وغالبا ده اللي بيحصل

بالنسبة لل REM بقى تسمى أيضا بالنوم الحالم أو Fast wave sleep
بيحصل ارتخاء لكل العضلات الهيكلية عدا عضلات الجفن و التنفس بيبقى سريع وغير منتظم وضربات القلب عددها بيزيد وضغط الدم بيعلى
الأحلام في لمرحلة دي بتتميز بأنها أحلام واضحة جدا ( بالألوان ) كأنك شايفها قدامك وانت صاحى ومن السهل انك تفتكرها لما تصحى وبتتأثر بيها عاطفيا يعنى لو حلم حلو تيقى قايم من النوم مبسوط ومزاجك حلو ولو حلم مش ظريف تبقى قايم من النوم متضايق وهكذا

كده نعتبر خلصا النوم نخش في الأحلام :

الأحلام عشان بتحصل أثناء النوم يعتبر كل اللي اتقال فيها نظريات لكنها مقبولة لكن الكلام المؤكد لسة ما وصلناش له

الأحلام : نوع من التفكير يتم أثناء النوم وبيكون غالبا في مرحلة REM طب هو ممكن يكون إيه سببه ؟؟؟

1- ممكن يكون رغبة مدفونة في العقل اللا واعى ومش عارف تحققها على أرض الواقع نظام الجعان يحلم بسوق العيش

2- ممكن تنبؤ بالمستقبل يعنى حاجات بتفكر في أحداث معينة قبل ما تنام وتكمل الأحداث في الحلم يكون بتقرأ قصة قبل ما تنام وتكمل بقيت أحداثها في الحلم أو انك بتذاكر وتحلم انك دخلت الامتحان وانك خلصت والأجازة بدأت
3-ممكن عندك مشكلة معينة شاغلة تفكيرك تحلم بالحل بتاعها

4- تكملة للى شاغل عقلك على أساس انك بتفكر وانت صاحى وبتفكر وانت نايم بس التفكير وانت نايم هو الأحلام

5- حاجة كمان اللي هى الرؤيا زى رؤيا الأنبياء وهى نوع من الوحى .

الأحلام والبيئة الخارجية :

زى ما قلنا قبل كده إن الادراك للبيئة الخارجية بيكون تقريبا مفيش لكن بعض المؤثرات الخاصة ممكن تكون موجوده وتأثر على الأحلام زى مثلا :

1- لو تقلت في الأكل هتحلم إن حد بيخنقك

2- لو نايم على السرير وفى حاجة تحت المرتبة مضايقاك هتحلم كأن حد بيضربك بسكينة في ظهرك

3- لو سلطنا ضوء أحمر على العين وانت نايم هتحلم بنار

4- لو شغلنا صوت جنبك هتحس انه جزء من الحلم

وحاجات تانية كتير .......................

الخلاصة : المخ عامل زى المخرج اللي بيخرجلك الفلم وانت البطل اللي بيعيش الأحداث وبيتفاعل معاها ومهما كانت غريبة أو مش منطقية مفيش مشكلة وما بنستغربهاش
وزى ما الدكتور نبيل فاروق قال في إحدى رواياته "يبدو أن الأحلام ستظل دوما حكرا على صاحبها "

أنا أعتقد إن ده شئ رائع ..................................

لا نشبع

كل واحد في حاجة معينة بيحبها مش بس بيحبها لأ بيعشقها ومهما أخد منها أو عملها ما بيزهقش ممكن الحاجة دي تكون الكتابة أو القراءة ممكن رياضة ممكن السفر ممكن التسوق ممكن الأكل المهم انه مهما عملها ما بيزهقش.

مفيش مشكلة المهم إنها ما تأثرش على حياته سواء عبادته أو شغله .
لحد هنا الكلام تمام اللي تاعبنى بقى بجد ليه أهالينا مش فاهمين الحتة دي ومش عاجبهم تصرفاتنا ؟
وليه مش بيساعدونا ؟

هما أه بيحبونا وكل حاجة و عايزين إن إحنا نبقى أحسن منهم بس ليه مش بيساعدونا عشان نبقى كويسين ؟ ولو ساعدونا بتبقى المساعدة عبارة عن واسطة يعنى سكة مش ظريفة
ليه دايما أهالينا عايزين إن إحنا نبقى نسخة منهم ؟

وليه عايزين إن إحنا نحقق اللي هما فشلوا فيه حتى وان كان ده مش متناسب مع قدراتنا أو مش عاجبنا ؟

بلاش كل اللى فات ده هما ليه عايزين إن إحنا ننبسط بأي حاجة كده وخلاص ؟

يعنى مثلا لو سافرت سفرية حلوة كده مع أصحابك في الأجازة يبقى أنت عملت اللى ما اتعملش وخلاص كفاية عليك كده
لو خرجت خروجة حلوة مع زمايلك يبقى خلاص مرة فى الأسبوع كفاية ده فى الأجازة ومرة فى الشهر أو السنة كفاية ده فى الدراسة حتى لو ما منعكش بس هما من جواهم متضايقين ؟
قبل الأجازة ما تخلص بشهر يعتبروها خلصت مع إن لسة شهر ويمكن أكتر كمان بس تقول إيه ؟؟ مش عارف!!!!!!!!!!!!!!!

أخر حاجة ليه أهالينا مش مقدرين إن إحنا شباب وعندنا طاقة ولازم نتحرك ونخرج ونسافر وان ده هو الطبيعي مش حاجة غريبة ولا غلط حتى وان كان فى ناس كتير ما بتعملش كده !

بس كل واحد يحاول على قد استطاعته
أتمنى إن أهالينا يبطلو يتعاملوا معانا زى النكتة اللي بتقول مرة طفل وأبوه فى السوبر ماركت الابن جاب لأبوه علبه شيكولاته و بيقول له بابا بحبها رد عليه وقال له حبها ورجعها مكانها.

ملحوظة:
أنا عمري ما شفت طفل بيشبع من الشيكولاته

أى حد عادى شاف الصورة دى أول انطباع هييجى فى دماغه ان دول أصحاب من زمان وبقالهم سنين مع بعض ده لأنهم مش لابسين بدل
لو كانوا لابسين بدل كان فى احتمال تانى انهم بيتصوروا علشان نشرة الأخبار
الحقيقة هما لا أصحاب من زمان ولا الصورة علشان النشرة
دى كانت تانى مرة نتقابل فيها وكل المدة اللى قضناها مع بعض لا تتجاوز عدة ساعات بس بجد أنا كنت مبتسم من قلبى رغم ان دى هى المرة الوحيدة اللى قعدنا واتكلمنا فيها مع بعض واحتمال تكون أخر مرة
بس بجد انا كنت سعيد جدا وسطهم وبجد بحبهم جدا وبجد واحشننى جدا جدا
وأسأل الله إن لم نلتقى ثانية فى هذه الدنيا أن نلتقى عند الحوض