كل واحد في حاجة معينة بيحبها مش بس بيحبها لأ بيعشقها ومهما أخد منها أو عملها ما بيزهقش ممكن الحاجة دي تكون الكتابة أو القراءة ممكن رياضة ممكن السفر ممكن التسوق ممكن الأكل المهم انه مهما عملها ما بيزهقش.
مفيش مشكلة المهم إنها ما تأثرش على حياته سواء عبادته أو شغله .
لحد هنا الكلام تمام اللي تاعبنى بقى بجد ليه أهالينا مش فاهمين الحتة دي ومش عاجبهم تصرفاتنا ؟
وليه مش بيساعدونا ؟
هما أه بيحبونا وكل حاجة و عايزين إن إحنا نبقى أحسن منهم بس ليه مش بيساعدونا عشان نبقى كويسين ؟ ولو ساعدونا بتبقى المساعدة عبارة عن واسطة يعنى سكة مش ظريفة
ليه دايما أهالينا عايزين إن إحنا نبقى نسخة منهم ؟
وليه عايزين إن إحنا نحقق اللي هما فشلوا فيه حتى وان كان ده مش متناسب مع قدراتنا أو مش عاجبنا ؟
بلاش كل اللى فات ده هما ليه عايزين إن إحنا ننبسط بأي حاجة كده وخلاص ؟
يعنى مثلا لو سافرت سفرية حلوة كده مع أصحابك في الأجازة يبقى أنت عملت اللى ما اتعملش وخلاص كفاية عليك كده
لو خرجت خروجة حلوة مع زمايلك يبقى خلاص مرة فى الأسبوع كفاية ده فى الأجازة ومرة فى الشهر أو السنة كفاية ده فى الدراسة حتى لو ما منعكش بس هما من جواهم متضايقين ؟
قبل الأجازة ما تخلص بشهر يعتبروها خلصت مع إن لسة شهر ويمكن أكتر كمان بس تقول إيه ؟؟ مش عارف!!!!!!!!!!!!!!!
أخر حاجة ليه أهالينا مش مقدرين إن إحنا شباب وعندنا طاقة ولازم نتحرك ونخرج ونسافر وان ده هو الطبيعي مش حاجة غريبة ولا غلط حتى وان كان فى ناس كتير ما بتعملش كده !
بس كل واحد يحاول على قد استطاعته
أتمنى إن أهالينا يبطلو يتعاملوا معانا زى النكتة اللي بتقول مرة طفل وأبوه فى السوبر ماركت الابن جاب لأبوه علبه شيكولاته و بيقول له بابا بحبها رد عليه وقال له حبها ورجعها مكانها.
ملحوظة:
أنا عمري ما شفت طفل بيشبع من الشيكولاته
هناك 4 تعليقات:
موضوع مهم على فكرة
حكاية لما حد يبقي خانقك عموما وأنت مش عارف السبب
وأنا باكره كلمة ليه ؟؟
لأن صعب تسأل سؤال بدايته ليه وتاخد إجابة تريحك
عامة يعنى المفروض أنك ولد وبتخرج وكده على كده انا عايشة حياتي لما بأخرج مرة فى الأسبوع فى الاجازة ورحلة فى سنة تبع الجامعة الواحد هيبدأ يحس أنه مدلع !!
عامة يعنى أنا وجهة نظري بعيدا عن كل ده أن الجيل القديم ليهم تفكيرهم مختلف عننا ومن الصعب تلاقى حد متفتح بما فيه الكفاية أنه يفهمك صح وبالتالى يبقي الحل الواحد يريح نفسه ويتعامل مع الوضع زى ما هو لأنه مش هيقدر يغيره للأسف غير بعد ما يبقي مسئول عن نفسه وده صعب فى الحالة اللى البلد دي فيها
ملحوظة برضه
أنا مابحبش الشوكلاته أساسا فعادي أن يبقي فيه طفل أو أى حد بيشبع من الشوكلاته لأن موجود ناس مابتحبش الشوكلاته من أصله :D
وأعتقد أن أنت أو أى حد المفروض يعامل أهله معاملة كويسة جداااا بس برضه يتناقش معاهم ويوصل للحاجة اللى هو عايزاه ويقنعهم أن هى أنسب له مع اللى هما عايزينه
المشكلة أن الموضوع ده مهم وهياخد وقت فى الكلام والمناقشة فالواحد أكيد هينسي نقط من غير ما يتكلم فيها بس يللا ما علينا
سلام
أنا الحمد لله عندي ف البيت مبيعملوش كده . بس دي مشكلة مع ناس كتير . أنا رأيي أنهم لو شافوك بتقعد معاهم و بتوريهم وشك في البيت وبتقعد تتكلم معاهم ممكن الموضوع يخف شوية . وبرشه ممكن تقعد تتفاهم معاهم في المشكلة دي وتتناقشوا . و في الآخر لو الموضع قفل . اسمع كلامهم هتعمل ايه يعني . و أهو كله في بر الوالدين يا دوك
MY FATE
شكرا على مرورك
"أنا باكره كلمة ليه ؟؟"
واحد من مشاكل التعليم عندنا إن إحنا مش بنسأل ليه عارف إن أحيانا بيكون صعب تلاقى إجابة بس بداية العلم السؤال وأول سؤال هو ليه ؟؟؟؟؟
” عامة يعنى المفروض أنك ولد وبتخرج وكده على كده أنا عايشة حياتي لما بأخرج مرة في الأسبوع في الأجازة ورحلة في سنة تبع الجامعة الواحد هيبدأ يحس أنه مدلع”
أنا مقدر ظروف انك بنت والمجتمع عندنا مش متقبل فكرة خروج البنت الكتير أو سفرها لوحدها رغم إن أنا شايف إن المفروض إنها تتربى على الحرية والاعتماد على النفس و إزاى تتعامل مع الناس بس لسة شوية لما المجتمع يبدأ يتقبل الفكرة دي وده محتاج مجهود كبير شوية على فكرة أنا بخاف على أختي جدا بس مش عايزها تتحبس في البيت طيب إيه الحل ؟ ممكن في اقتراح لو مجموعة بنات عايزين يطلعو رحلة مع بعض سواء سفر عادى أو مصيف أو أي حاجة تانية يتجمعوا ويجمعوا أمهاتهم ويطلعوا كلهم مع بعض اهو منه إن الأهل يطمنو ومنه نقلل الفجوة بين الجيلين ده حل مقترح
حل تانى إن أم واحدة من البنات اللي طالعين تطلع معاهم كمشرفة و تاخد بالها منهم وهكذا ممكن تفكر في حلول كتير لحد الوضع ما يتحسن والمجتمع مخه يكبر والشباب يعقلوا وكل واحد يعرف إن اللي ماشية في الشارع دي أخته أو والدته أو مراتة أو خالته أو عمته واللي ما يرضهوش لأهل بيته ما يرضهوش لغيره
"الجيل القديم ليهم تفكيرهم مختلف عننا ومن الصعب تلاقى حد متفتح بما فيه الكفاية أنه يفهمك"
أنا معاك في إن الجيل القديم تفكيرهم مختلف لكن ما نشوف الرسول صلى الله عليه وسلم والصحابة حلوا المشكلة دي إزاى
سيدنا على بن أبى طالب يقول : (ربوا أبناءكم لزمان غير زمانكم فإنهم خلقوا لزمان غير زمانكم)
لازم إن أهلنا يدركوا الفكرة دي إن زمنهم غير زمنا وإن الناس اتغيرت والوضع اتغير وأبسط مثال لو هما بيقلقوا عليا مثلا لما أتأخر ما يكلموني على الموبايل ويعرفوا إيه الوضع!!!!!!
لازم الأهالي ينفتحوا أكتر من كده و يعرفو إن مفيش حد مننا بيتعمد يستفزهم أو يضايقهم أو يزعلهم بس هى مجرد اختلاف وجهات نظر مش أكتر يعنى من شوية خالتي بتشتكى من إن ابنها بيتأخر بقولها الجيل كله كده وإيه المشكلة إن هو ييجى متأخر طالما أنت عارفه هو فين ولو عايزاه في أي وقت كلميه على الموبايل ييجى علطول ترد عليا تقوللى أصل زمان كان اللي بيتأخر يبقى بايظ ومش محترم رحت قايلها أنت بنفسك قلتي زمان بس دلوقتى عادى وأي واحد يقلك ابنك أتأخر ليه قوليله أنت ابنك رجع الساعة كام مش هيرد لأن كلنا جيل واحد
و إن شاء الله الجيل اللي هيخلى العالم جنة
"يبقي الحل الواحد يريح نفسه ويتعامل مع الوضع زى ما هو لأنه مش هيقدر يغيره للأسف"
عمر ما كان الحل إن الواحد يريح نفسه مهما كانت المشكلة و مفيش حاجة مستحيل تتغير و إلا ما كانش أي حد من العظماء اللي في التاريخ نجح لأن كل واحد منهم كان قدامه مجتمع كامل رافض الفكرة أو المنهج اللي هو جاى بيه م وأبسط مثال هو جميع الرسل والأنبياء مثلا النبي محمد صلى الله عليه وسلم ويليهم العلماء مثلا ابن الهيثم اتسجن عشان آراءه وغيره ومنهم اللي قتل أول عالم شرح جثة إنسان اعدم
فمينفعش نريح نفسنا
الحل إن إحنا نحاول نقرب وجهات النظر بينا وبينهم نحاول نقرب منهم ونصاحبهم ونستفيد من خبراته وهما يستفيدوا مننا ومن حماسة الشباب اللي عندنا المجتمع مش هينهض بيهم بس ولا بينا بس العالم محتاج للكل إحنا وهما قوة وحماسة وجرأة الشباب وحكمة وخبرة وتجارب الكبار
دوري أنا ودورك ودور محمد وأسامة وأسماء ومريم وهيثم و............... الخ هو إن كل واحد يحاول مع أهله ويحاول يقرب الأفكار لأن لو كل واحد ريح نفسه المشكلة مش هتتحل دي هتزيد ولو إحنا ما حاولناش نصلح من دلوقتى يوم ما كل واحد فينا يبقى مسؤل هيكون في المعسكر التانى ومش هيعمل حاجة أنا عارف إن الموضوع صعب جدا بس مش مستحيل وإيه المشكلة لما نجرب إذا نجحنا هو ده المطلوب وإذا لا قدر الله فشلنا مفيش مشكلة نبقى زحزحنا الصخرة 2 سم وييجى غيرنا يزحزحها 2 سم تانى وهكذا لحد ما نوصلها للمكان المطلوب
"وأعتقد أن أنت أو أي حد المفروض يعامل أهله معاملة كويسة جدا"
أكيد طبعا ولا تقل لهما أف ولا تنهرهما
وصاحبهما في الدنيا معروفا
بالنسبة لموضوع النوم والأحلام أنا بجهز موضوع كامل وان شاء الله أنزله قريب على المدونة
ملحوظة:
"أنا مابحبش الشوكلاته أساسا"
أنا طبعا ما أقصدش الشوكلاته نفسها الشوكلاته ده رمز لأي حاجة الشخص بيحبها وكمان النكتة كانت شوكلاته المرة الجاية ممكن تكون عصير أو شبسى على حسب هأعمل استطلاع رأى وأشوف الناس بتحب ايه أكتر بس بجد أنا عن نفسي بعشق الشوكلاته وما بشبعش منها
لأ أنا مش قصدى نريح دماغنا أنك تريح دماغك يعنى تسيب الوضع زى ما هو عليه انا قصدى لما تحاول وتفشل وترجع تحاول وتفشل أنك تغير وجهة نظرهم لحاجة تعتبر عادية فى الوقت أو بالنسبة للجيل بتاعنا يبقي الحل أنك تريح دماغك وتحاول تتأقلم مع الوضع بتاعهم لحد ما يخلص لأنك لما تستقل بنفسك هتعمل اللى أنت عايزاه وفى نفس الوقت شايف أنه صح
يعنى الحاجات اللى مش هتقدر تغيرها يبقي تبطل تسأل ليه لأن مش كل حاجة ليها اجابة ودى المشكلة ما انت لما بتسأل ليه الشمس بتشرق من الشرق مش هتلاقى اجابة وفى الحالة دى كلمة ليه كلمة أنا مش باحبها وبالتالى أنت بتتقبل حقيقة أن الشمس بتشرق من الشرق وبتتقبل وجهة نظر أهلك فى المواضيع بتاعت الجيل بتاعنا لما تفشل تغيرها وبتريح دماغك
لأن أنك تفضل تسأل ليه على حاجة ملهاش اجابة أو حاجة مش هتتغير يبقي أنت بتتعب نفسك على الفاضى ويستحسن أن الواحد يوجه طاقته لحاجة تانية
وحكاية الشوكلاته أنا كنت بأهزر يعنى على أساس أن مش باحبها أصلا فلو حصلت ليا موقف النكتة مش هتفرق معايا خالص
وإن شاء الله هأستنى الموضوع الجديد بتاع الأحلام
سلام
إرسال تعليق